అతి విద్య నేర్చుట-యన్న వస్త్రములకే

సీ॥

అతి విద్య నేర్చుట-యన్న వస్త్రములకే

పశుల నార్జించుట- పాల కొఱకె

సతిని బెండ్లాడుట- సంసార సుఖమునకే

సుతులఁ బోషించుటఁ-గతుల కొఱకె

సైన్యముల్ గూర్చుట-శత్రు భయంబుకే

సామునేర్చుటెల్ల-చావు కొఱకే

దానమిచ్చుట ముం-దటి సంచితమునకె

ఘనముగాఁ జదువుటల్-కడుపు కొఱకె

తే॥

యితర కామంబుఁ గోరక-సతతముగను

భక్తి నీ యందు నిలుపుట-ముక్తి కొఱకె

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

భువనరక్షక!నిన్నుఁ -బొగడ నేరని నోరు

సీ॥

భువనరక్షక!నిన్నుఁ-బొగడ నేరని నోరు

బ్రజ కగోచరమైన-పాడుబొంద

సురవరార్చిత!నిన్ను-జూడ గోరని కనుల్

జలములోపల నెల్లి-సరపుగుండ్లు

శ్రీరమాధిప!నీకు-సేవఁ జేయని మేను

కూలి కమ్ముడువోని-కొలిమి తిత్తి

వేడ్కతో నీ కథల్-వినని కర్ణంబులు

గఠిన శిలాదుల-గలుగు దొఱలు

తే॥

పద్మలోచన నీ మీఁద-భక్తి లేని

మానవుఁడు రెండు పాదాల-మహిషమయ్య

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

కర్ణ యుగ్మమున నీ-కథలు సోకినఁ జాలు

సీ॥

కర్ణ యుగ్మమున నీ-కథలు సోకినఁజాలు

పెద్ద పోగుల జోళ్ళు-పెట్టినట్లు

చేతులెత్తుచుఁ బూజ-చేయఁగల్గినఁ జాలు

దొరగ్గాన కడియాలు-దొడిగినట్లు

మొనసి మస్తకముతొ- మ్రొక్కఁగల్గినఁ జాలు

జెలువమైన తీరాయి-జెక్కినట్లు

స్వరము నొవ్వంగ నీ-స్మరణ గల్గినఁజాలు

వింతగా కంఠాలు-వేసినట్లు

తే॥

పూని నినుఁ గొల్చుటే సర్వ-భూషణంబు

లితర భూషణముల నిచ్చ- గింపనేల?

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

భుజబలంబునఁ బెద్ద- పులులఁ జంపంగవచ్చు

సీ॥

భుజబలంబునఁ బెద్ద-పులులఁ జంపంగవచ్చు

పాము కంఠముఁ చేత-బట్టవచ్చు

బ్రహ్మరాక్షస కోట్ల-బాఱఁద్రోలఁగ వచ్చు

మనుజుల రోగముల్-మాన్పవచ్చు

జిహ్వ కిష్టముగాని-చేదు మ్రింగగవచ్చు

పదును ఖడ్గము చేత- నదుమవచ్చుఁ

గష్ట మొందుచు ముండ్ల-కంపలోఁ జొరవచ్చుఁ

దిట్టుబోతుల నోళ్ళు-కట్టవచ్చుఁ

తే॥

పుడమిలో దుష్టులకు జ్ఞాన-బోధ తెలిపి

సజ్జనులఁ జేయలేఁడెంత-చతురుఁడైన

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

అవనిలోఁగల యాత్ర-లన్ని చేయగవచ్చు

సీ॥

అవనిలోఁగల యాత్ర-లన్ని చేయగవచ్చు

ముఖ్యమౌ నదులందు-మునుఁగవచ్చు

ముక్కు పట్టుక సంధ్య-మొనసి వార్చగవచ్చు

దిన్నఁగా జపమాల-ద్రిప్పవచ్చు

వేదాల కర్ధంబు-విఱిచి చెప్పఁగవచ్చు

శ్రేష్ఠ క్రతువులెల్ల-జేయవచ్చు

ధనము లక్షలు కోట్లు-దానమీయగవచ్చు

నైష్ఠి కాచారముల్-నడుపవచ్చు

తే॥

చిత్త మన్యస్థలంబునఁ-జేరకుండ

నీ పదాంభోజములందు-నిలుపగలమె?

భూషణవికాస!శ్రీధర్మ!-పురనివాస!

దుష్టసంహార!నరసింహ!-దురితదూర!

అధిక విద్యావంతు-లప్రయోజకులైరి

సీ॥

అధిక విద్యావంతు- లప్రయోజకులైరి

పూర్ణశుంఠలు సభా-పూజ్యులైరి

సత్యవంతుల మాట-జన విరోధంబాయె

వదఱుబోతులమాట-వాసికెక్కె

ధర్మవాదనపరుల్-దారిద్ర్యమొందిరి

పరమ లోభులు ధన-ప్రాప్తులైరి

పుణ్యవంతులు రోగ-భూత పీడితులైరి

దుష్టమానవులు వ-ర్దిష్ణులైరి

తే॥

పక్షివాహన!మావంటి-భిక్షకులకు

శక్తిలేదాయె నిఁక నీవె-చాటు మాకు

భూషణవికాస!శ్రీధర్మ!-పురనివాస!

దుష్టసంహార!నరసింహ!-దురితదూర!

ఉర్విలో నాయుష్య-మున్న పర్యంతంబు

సీ॥

ఉర్విలో నాయుష్య-మున్న పర్యంతంబు

మాయ సంసారంబు-మఱిగి నరుఁడు

సకల పాపములైతె-సంగ్రహించును గాని

నిన్ను జేరెడి యుక్తి-నేర్వలేఁడు

తుదకు గాలుని వద్ద-దూత లిద్దఱు వచ్చి

గుంజుక చిన్న వారు-కొట్టుచుండ

హింస కోర్వఁగ లేక-యేడ్చి గంతులు వైచి

దిక్కు లేదని నాల్గు-దిశలు జూడఁ

తే॥

తన్ను విడిపింపవచ్చెడి-ధన్యుడేడి!

ముందు నీ దాసుఁడై యున్న-ముక్తి గలుగు

భూషణవికాస!శ్రీధర్మ!-పురనివాస!

దుష్టసంహార!నరసింహ!-దురితదూర!

అతిశయంబుగఁ కల్ల-లాడనేర్చితిఁ గాని

సీ॥

అతిశయంబుగఁ కల్ల-లాడనేర్చితిఁ గాని

పాటిగా సత్యముల్-పలికి యెరుగ

సత్కార్య విఘ్నముల్-సలుప నేర్చితిఁ గాని

యిష్ట మొందగ-నిర్వహింప నేర

ఒకరి సొమ్ముకు దోసి లొగ్గ- నేర్చితిఁ గాని

చెలువుగా ధర్మంబు-సేయనేర

ధనము లియ్యంగ వ-ద్దనగ నేర్చితిఁ గాని

శీఘ్ర మిచ్చెడునట్లు-చెప్పనేరఁ

తే॥

పంకజాతాక్ష!నేనెంత-పాతకుడను!

దప్పులన్నియు క్షమియింప-దండ్రి నీవె

భూషణవికాస! శ్రీధర్మ!-పురనివాస!

దుష్టసంహార!నరసింహ!-దురితదూర!

నీమీద కీర్తనల్-నిత్య గానముఁ జేసి

సీ॥

నీ మీద కీర్తనల్-నిత్య గానముఁ జేసి

రమ్యమొందింప నా-రదుఁడఁగాను

సావధానముగ నీ-చరణ పంకజ సేవ

సలిపి మెప్పింపంగ-శబరిఁ గాను

బాల్య మప్పటినుండి-భక్తి నీయందున

గలగగ బ్రహ్లాద-ఘనుఁడగాను

ఘనముగా నీమీఁద-గ్రంథముల్ గల్పించి

వినుతి సేయను వ్యాస-మునిని గాను

తే॥

సాధుఁడను,మూర్ఖమతి,మను-ష్యాధముడను,

హీనుడను సుమ్మి నీవు న-న్నేలుకొనుము!

భూషణవికాస!శ్రీథర్మ!-పురనివాస!

దుష్టసంహార!నరసింహ!-దురితదూర!

ఇభరాజవరద!ని-న్నెంత పిల్చినఁగాని

సీ॥

ఇభరాజవరద!ని-న్నెంత పిల్చినఁగాని

మాఱుపల్కవ దేమి-మౌని తనము?

మునిజనార్చిత-నిన్ను-మ్రొక్కి వేఁడినఁగాని

కనులఁ బడవదేమి-గడుసుదనము?

చాల దైన్యమునొంది-చాటు జొచ్చినఁగాని

భాగ్యమియ్య వదేమి-ప్రౌఢితనము?

స్థిరముగా నీ పాదసేవఁ -జేసెదనన్న

దొరకఁజాల వదేమి-ధూర్తతనము?

తే॥

మోక్షదాయక!ఇటువంటి-మూర్ఖజనుని

కష్టపెట్టిన నీకేమి-కడుపునిండు?

భూషణవికాస!శ్రీధర్మ!-పురనివాస!

దుష్టసంహార!నరసింహ!దురితదూర!

తల్లితండ్రులు భార్య-తనయు లాప్తులు బావ

సీ॥

తల్లిదండ్రులు భార్య-తనయు లాప్తులు బావ

మఱుదులన్నలు మేన-మామగారు

ఘనముగా బంధువుల్-గల్గినప్పటికైన

దాను దర్లగ వెంటఁ-దగిలి రారు

యమునిదూతలు ప్రాణ- మపహరించుక పోఁవ

మమతతోఁ బోరాడి-మాన్పలేరు

బలగ మందఱు దుఃఖ-పడుట మాత్రమె కాని

యించుక నాయుష్య-మివ్వలేరు

తే॥

చుట్టములమీఁది భ్రమదీసి- చూరబెట్టి

సంతతము మిమ్మునమ్ముట-సార్థకంబు

భూషణవికాస! శ్రీధర్మ!-పురనివాస!

దుష్టసంహార!నరసింహ!-దురితదూర!

పాంచభౌతికము దు-ర్భరమైన కాయం బి

సీ॥

పాంచ భౌతికము దు-ర్భరమైన కాయం బి

దెప్పుడో విడచుట-యెఱుక లేదు

శత వర్షములదాఁక-మితముఁ జెప్పిరి గాని

నమ్మరాదా మాట-నెమ్మనమున

బాల్యమందో,మంచి - ప్రాయమందో,లేక,

ముదిమియందో లేక-ముసలియందొ,

యూరనో,యడవినో-యుదక మధ్యముననో

యెప్పుడో విడుచుట- యే క్షణంబొ

తే॥

మరణమే నిశ్చయము బుద్ధి-మంతుఁడైన

దేహమున్నంతలో మిమ్ముఁ -దెలియవలయు

భూషణవికాస!శ్రీధర్మ!-పురనివాస!

దుష్టసంహార!నరసింహ!-దురితదూర!

బ్రతికినన్నాళ్ళు నీ -భజన తప్పను గాని

సీ॥

బ్రతికినన్నాళ్ళు నీ-భజన తప్పను గాని

మరణకాలము నందు మఱుతునేమొ!

ఆవేళ యమదూత-లాగ్రహంబున వచ్చి

ప్రాణముల్ పెకలించి-పట్టునపుడు

కఫవాత పైత్యముల్-గప్పగాఁ భ్రమచేత

గంపముద్భవముంది-కష్టపడుచు

నా జిహ్వతో నిన్ను-నారాయణా యంచు

బిలుతునో,శ్రమచేతఁ-బిలువలేనొ!

తే॥

నాఁటికిప్పుడె భక్తి నీ-నామ భజన

తలఁచెదను జెవిని వినవయ్య-ధైర్యముగను

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

నీల మేఘశ్యామ!-నీవె తండ్రివి మాకు

సీ॥

నీలమేఘశ్యామ!-నీవె తండ్రివి మాకు

కమలవాసిని మమ్ము-గన్నతల్లి

నీ భక్తవరులంత-నిజమైన బాంధవుల్

నీ కటాక్షము మా క-నేక ధనము

నీ కీర్తనల్ మాకు-లోక ప్రపంచంబు

నీ సహాయము మాకు-నిత్య సుఖము

నీ మంత్రమే మాకు-నిష్కళంకపు విద్య

నీ పద ధ్యానంబు-నిత్య జపము

తే॥

తోయజాతాక్ష!నీ పాద-తులసి దళము

రోగముల కౌషధము బ్రహ్మ రుద్ర వినుత

భూషణవికాస! శ్రీధర్మ-పురనివాస!

దుష్టసంహార!నరసింహ!-దురితదూర!

తనువులోఁ బ్రాణముల్-తరలి పోయెడి వేళ

సీ॥

తనువులోఁ బ్రాణముల్-తరలి పోయెడి వేళ

నీ స్వరూపమును ధ్యా-నించు నతఁడు

నిమిషమాత్రము లోన-నిన్ను జేరును కాని

యముని చేతికి జిక్కి-శ్రమల బడఁడు

పరమ సంతోషాన-భజనఁ చేసెడి వారి

పుణ్య మేమనవచ్చు-భోగిశయన!

మోక్షము నీ దాస- ముఖ్యుల కగుఁగాని

నరక మెక్కడిదయ్య-నళిన నేత్ర!

తే॥

కమలనాభ!నీ మహిమ-గానలేని

తుచ్ఛులకు ముక్తి దొరకుట -దుర్లభంబు

భూషణవికాస !శ్రీధర్మ!-పురనివాస!

దుష్టసంహార!నరసింహ!-దురితదూర!

లోకమందెవడైన -లోభి మానవుఁడున్న

సీ॥

లోకమందెవడైన - లోభి మానవుఁడున్న

భిక్ష మర్ధికి జేతఁ-బెట్టలేడు

తాను బెట్టకయున్న-దగవు పుట్టదు గాని

యొరులు పెట్టఁగ జూచి-యోర్వలేడు

దాత దగ్గఱఁజేరి- తన ముల్లె చెడునట్లు

జిహ్వతోఁ జాడీలు-చెప్పుచుండు

ఫలము విఘ్నంబైన-బలు సంతసమునందు

మేలు కల్గినఁ జాల-మిడుకుచుండు

తే॥

శ్రీరమానాథఁ యిటువంటి-కృూరునకును

భిక్షకుల శత్రువని పేరు-పెట్టవచ్చు

భూషణవికాస !శ్రీధర్మ-పురనివాస!

దుష్టసంహార!నరసింహ!-దురితదూర !

తల్లి గర్భమునుండి-ధనము తేఁడెవ్వఁడు

సీ॥

తల్లి గర్భమునుండి- ధనము తేఁ డెవ్వఁడు

వెళ్ళిపోయెడినాడు-వెంటరాదు

లక్షాధికారైన-లవణ మన్నమె కాని

మెఱుఁగు బంగారంబు-మ్రింగబోఁడు

విత్తమార్జనఁజేసి-విఱ్ఱవీఁగుటె కాని

కూడ బెట్టిన సొమ్ము-కుడువబోఁడు

పొందుగా మఱుగైన-భూమిలోపలఁబెట్టి

దానధర్మము లేక-దాఁచి దాఁచి

తే॥

తుదకు దొంగల కిత్తురో-దొరల కవునొ

తేనె జుంటీగ లియ్యవా-తెరువరులకు!

భూషణవికాస!శ్రీధర్మ!-పురవివాస!

దుష్టసంహార!నరసింహ!-దురితదూర!

మాన్యంబు లీయ స-మర్ధుఁ డొక్కఁడు లేఁడు

సీ॥

మాన్యంబు లీయ స- మర్ధుఁ డొక్కఁడు లేఁడు

మాన్యముల్ చెఱుప స-మర్ధులంత

యెండిన యూళ్ళగోఁ-డెరిఁగింపఁ డెవ్వడు

పండిన యూళ్ళకుఁ-ప్రభువులంత

యితఁడు పేద యటంచు-నెఱిగింపడెవ్వడు

గలవారి సిరులెన్న-గలరు చాలఁ

దన యాలి చేష్టల-దప్పెన్నఁ డెవ్వడు

పెఱకాంత ఱంకెన్నఁ-బెద్దలంత

తే॥

యిట్టి దుష్టుల కధికార-మిచ్చినట్టి

ప్రభువు తప్పులంచును మరి-బలుకవలెను

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

కోతికి జలతారు-కుళ్ళాయి యేటికి?

సీ॥
కోతికి జలతారు-కుళ్ళాయి యేటికి?
విరజాజి పూదండ-విధవ కేల?
ముక్కిడి తొత్తుకు-ముత్తెంపు నత్తేల?
అద్దమేటికి జా-త్యంధునకును?
మాచకమ్మకు నేల-మౌక్తిక హారముల్?
క్రూరచిత్తునకు స-ద్గోష్టులేల?
ఱంకుబోతుకు నేల-బింకంపు నిష్ఠలు
వావి యేటికి దుష్ట-వర్తనునకుఁ
తే॥
మాటనిలకడ సుంకరి-మోటుకేల?
చెవిటివానికి సత్కథా-శ్రవణమేల?
భూషణవికాస!శ్రీధర్మ-పురవివాస!
దుష్టసంహార!నరసింహ!-దురితదూర!

పసరంబు పంజైనఁ-బసులఁ గాపరి తప్పు

సీ॥

పసరంబు పంజైనఁ-బసులఁ గాపరి తప్పు

ప్రజలు దుర్జనులైన-ప్రభుని తప్పు

భార్య గయ్యాళైనఁ-బ్రాణనాథుని తప్పు

తనయుండు దుష్టైనఁ-తండ్రి తప్పు

సైన్యంబు చెదిరిన-సైన్యనాథుని తప్పు

కూఁతురు చెడుగైన-మాత తప్పు 

అశ్వంబు చెడుగైన-నారోహకుని తప్పు

హస్తి దుష్టైన-హస్తీపకుని తప్పు

తే॥

ఇట్టి తప్పులెఱుంగక-యిచ్చవచ్చి

నటుల మెలఁగుదు రిప్పుడీ-యవని జనులు

భూషణవికాస!శ్రీధర్మ-పురనివాస!

దుష్టసంహార!నరసింహ!-దురితదూర!

గార్ధభంబున కేల-కస్తూరి తిలకంబు

సీ|| గార్ధభంబున కేల- కస్తూరి తిలకంబు మర్కటంబున కేల-మలయజంబు శార్దూలముల కేల-శర్కరాపూపంబు సూకరంబున కేల-చూతఫలము మార్జాలమున కేల- మల్లెపువ్వుల బంతి గుడ్లగూబకు నేల-కుండలములు మహిషంబున కేల- నిర్మల వస్త్రముల్ బక సంతతికి నేల-పంజరంబు తే॥ ద్రోహచింతన జేసెడు-దుర్జనులకు మధురమైనట్టి నీ నామ-మంత్రమేల భూషణవికాస!శ్రీధర్మ-పురనివాస! దుష్టసంహార!నరసింహ!-దురితదూర!

అర్ధివాండ్రకు నీక-హాని చేయుట కంటె

సీ॥
అర్ధివాండ్రకు నీక-హాని చేయుటకంటె
దెంపుతో వసనాభి- దినుటమేలు
ఆడుబిడ్డల సొమ్ము-నపహరించుటకంటె
బండఁ గట్టుక నూతఁ-బడుటమేలు
పరుల కాంతలబట్టి-బల్మిఁ గూడుటకంటె
బడబాగ్ని కీలలఁ-బడుటమేలు
బ్రతుకఁజాలక దొంగ-పనులు చేయిటకంటె
కొంగుతో ముష్టెత్తు-కొనుటమేలు
తే॥
జలజదళనేత్ర నీ భక్త-జనులతోడ
జగడమాడుటకంటెను-చావుమేలు
భూషణవికాస!శ్రీధర్మ-పురనివాస!
దుష్టసంహార!నరసింహ!-దురితదూర!

నరసింహ శతకము...గౌతమీ స్నానాన-గడతేరుదామంటె

సీ॥
గౌతమీ స్నానాన-గడతేరుదామంటె
మొనసి చన్నీళ్ళలో-మునగలేను
తీర్థయాత్రలచేఁ గృ-తార్థుఁ డౌదామంటె
బడలి నేమంబు నే-నడుపలేను
దానధర్మముల స-ద్గతిని జెందుదమంటె
ఘనముగా నా వద్ద-ధనము లేదు
తపమాచరించి సా-ర్ధకత నొందుదమంటె
నిమిషమైన మనసు-నిలుప లేను
తే॥
కష్టముల కోర్వ నా చేతఁ-కాదు,నిన్ను
స్మరణ చేసెద నా యథా-శక్తి కొలఁది
భూషణవికాస!శ్రీధర్మ-పురనివాస!
దుష్టసంహార!సరసింహ!-దురితదూర!

శ్రవణ రంధ్రముల నీ- సత్కథల్ పాడంగ

సీ॥
శ్రవణ రంధ్రముల నీ- సత్కథల్ పాడంగ
లేశ మానందంబు-లేనివాడు
బుణ్యవంతులు నిన్నుఁ-బూజసేయఁగ జూచి
భావమం దుత్సాహ-పడనివాఁడు
భక్తవర్యులు నీ ప్రభా-వముల్ పొగడంగఁ
దత్పరత్వము లేక-తలఁగువాఁడు
తన చిత్తమందు నీ-ధ్యాన మెన్నఁడులేక
కాలమంతయు వృధా-గడపువాఁడు
తే॥
వసుధలోనెల్ల వ్యర్ధుడు-వాఁడెయగును
మరియు జెడుగాక యెప్పుడు-మమతనొంది
భూషణవికాస!శ్రీధర్మ-పురనివాస!
దుష్టసంహార!నరసింహ!-దురితదూర !

చిత్త శుద్ధిగ నీకు-సేవజేసెదఁ గాని

సీ॥
చిత్తశుద్ధిగ నీకు-సేవ జేసెదఁగాని
పుడమిలో జనుల మె-ప్పులకుఁ గాదు
జన్మ పావనతకై-స్మరణఁజేసెదఁ గాని
సరివారిలోఁ ప్రతి- ష్ఠలకుఁగాదు
ముక్తికోసము నే-మ్రొక్కి వేడెదఁ గాని
దండిభాగ్యము నిమి-త్తంబుగాదు
నిన్నుఁ బొగడు విద్య-నేర్చితినేకాని
కుక్షినింపెడి కూటి-కొఱకుఁ గాదు
తే॥
పారమార్థికమునకు నేఁ-బాటుపడితిఁ
కీర్తికి నపేక్ష పడలేదు-కృష్ణవర్ణ!
భూషణవికాస!శ్రీధర్మ-పురవివాస!
దుష్టసంహార!నరసింహ!-దురితదూర!

మందుడనని నన్ను-నింద జేసిన నేమి?

సీ॥
మందుడనని నన్ను-నింద జేసిన నేమి?
నా దీనతను జూచి-నవ్వనేమి?
దూరభావము లేక- తూలనాడిన నేమి?
ప్రీతి సేయక వంకఁ-బెట్టనేమి?
కక్కసంబులు పల్కి-వెక్కిరించిన నేమి?
తీవ్రకోపము చేత-దిట్టనేమి?
హెచ్చుమాటల చేత-నెమ్మలాడిన నేమి?
చేరి దాపట గేలి-సేయనేమి?
తే॥
కల్పవృక్షము వలె నీవు-గల్గ నింకఁ
బ్రజల లక్ష్యంబు నాకేల-పద్మనాభ!
భూషణవికాస!శ్రీధర్మ-పుర నివాస!
దుష్టసంహార!నరసింహ!-దురితదూర!

ఐశ్వర్యములకు ని-న్ననుసరింపగలేదు

సీ॥
ఐశ్వర్యములకు ని-న్ననుసరింపగలేదు
ద్రవ్యమిమ్మని వెంటఁ-దగులలేదు
కనక మిమ్మని చాలఁ-గష్టపెట్టగలేదు
పల్లకిమ్మని నోటఁ-పలుకలేదు
సొమ్ములిమ్మని నిన్ను-నమ్మి కొల్వఁగలేదు
భూములిమ్మని పేరు-పొగడలేదు
బలము నిమ్మని నిన్ను-బ్రతిమాలగాలేదు
పశులనిమ్మని పట్టు-పట్టలేదు
తే॥
నేను గోరిన దొక్కటే-నీలవర్ణ
చయ్యనను మోక్ష మిచ్చినఁ-జాలు నాకు
భూషణవికాస!శ్రీధర్మ-పురనివాస!
దుష్టసంహార!నరసింహ!-దురితదూర!

ఆది నారాయణా-యనుచు నాలుకతోడఁ

సీ.
ఆదినారాయణా-యనుచు నాలుకతోడఁ
బలుక నేర్చినవారి-పాదములకు
సాష్టాంగముగ నమస్కార-మర్పణ జేఁసి
ప్రస్తుతించెదనయ్య-బహువిధముల
ధరణిలో నరులెంత-దండివారైనను
నిన్నుఁగాననివారి-నే స్మరింప
మేము శ్రేష్టులమంచు-మిడుకుచుండెడివారి
చెంతఁ జేరఁగబోను-శేషశయన
తే॥
పరమ సాత్త్వికులైన నీ- భక్తవరుల
దాసులకు దాసుఁడను సుమీ-ధరణిలోన
భూషణవికాస!శ్రీధర్మ-పురవివాస!
దుష్టసంహార!నరసింహ!-దురితదూర!

నరసింహ!నీ దివ్య-నామ మంత్రముచేత

నరసింహ!నీ దివ్య-నామ మంత్రము చేత
దురిత జాలము లెల్ల-ద్రోలవచ్చు
నరసింహ!నీ దివ్య-నామ మంత్రము చేత
బలుపైన రోగముల్-బాపవచ్చు
నరసింహ!నీ దివ్య-నామ మంత్రము చేత
రిపు సంఘముల సంహ-రింపవచ్చు
నరసింహ!నీ దివ్య-నామ మంత్రము చేత
దండహస్తుని బంట్ల-దఱుమవచ్చు
తే॥
భళిర!నే నీ మహామంత్ర-బలము చేత
దివ్య వైకుంఠ పదవి సా-ధింపవచ్చు
భూషణవికాస!శ్రీధర్మ-పుర నివాస!
దుష్టసంహార!నరసింహ!-దురితదూర!

పద్మలోచన!సీస పద్యముల్ నీ మీఁద

పద్మలోచన!సీసపద్యముల్ నీమీఁద
జెప్పఁబూనితినయ్య,చిత్తగింపు
గణ యతి ప్రాస లక్షణముఁ జూడఁను లేదు
పంచకావ్య శ్లోకపఠన లేదు
అమరకాండత్రయం బరసి చూడఁగలేదు
శాస్త్రీయ గ్రంథముల్ చదువలేదు
నీ కటాక్షంబున నే రచించితిఁగాని
ప్రజ్ఞ నాయదిగాదు ప్రస్తుతింపఁ
తే॥
తప్పుపడ నేమి సద్భక్తి తక్కువౌనె?
చెఱకునకు వంక పోనేమి-చెడునె తీపి
భూషణవికాస!శ్రీధర్మ-పుర నివాస!
దుష్టసంహార!నరసింహ!-దురితదూర!

శ్రీ మనోహర!సురా-ర్చిత!సింధుగంభీర!

శ్రీ మనోహర!సురా-ర్చిత!సింధుగంభీర! భక్తవత్సల!కోటి-భానుతేజ! కంజనేత్ర!హిరణ్య-కశ్యపాంతక శూర! సాధురక్షణ!శంఖ-చక్రహస్త! ప్రహ్లాదవరద!పా-పధ్వంశ!సర్వేశ! క్షీరసాగరశయన!-కృష్ణవర్ణ! పక్షివాహన!నీల-భ్రమరకుంతలజాల! పల్లవారుణ పాద-పద్మ యుగళ! తే॥చారు శ్రీ చందనాగురు-చర్చితాంగ! కుందకుట్మలదంత!వై-కుంఠ ధామ! భూషణవికాస!శ్రీధర్మ-పురనివాస! దుష్టసంహార!నరసింహ!-దురితదూర!